"V'Abbruciasturu u culu"

Mbare politico. Ascuta a mmia.

T'arrivoddi quannu ppi savvari due euro tagghiavi tutti l'avvuri a posto ri abbissarilli? Tanto cu s'innadduna se l'avvuru non c'è cchiu?! Nuddu.

E t'arrivoddi quannu nun abbissasti a fogna picchi custava troppu assai? E ndura a facisti calari a mmari cu tutti i cosi loddi ca' finisciunu unni ti paparii?

E t'arrivoddi che dda zona vota invece ca farici bello parco tipo a villa, ci runasti a quel mafiusu ppi farici cemento supra cemento?

Bene. Uora stamu arrustennu macari sutta l'aria condizionata. E inserta picchì? Picchì non avemu cchiu acqua, luci e avvuri. Picchì senza avvuri non c'è ombra e a sciata è comu u focu. E non avemu manco acqua ppi stutarlu stu focu. E manco luci nde casi. E manco a mmari putemu iri ca l'acqua feti.

Mbare Politico ... a comu ta calasti tutta sta terra biniritta? Semu cunsumati e non te ne adduni.

A Sicilia abbrucia e tu fai u bestia. Se non ti sputiamo nuautri, ti sputeranno i to' niputi. A non t'affrunti? A non ci vivi macari tu qua o tu attoppi dalla luna?! E macari ca fussi non po' scappari: u focu si manciau strade e aeroporti. Fossi ca fossi si mancia macari a ttia. Fossi ca fossi...